ГОЛЕМА АВИОНСКА ТРАГЕДИЈА НА БАХАМИ: Се урна авион пред слетување, загинаа сите 10 лица
Трагедија ги потресе Бахамите на денот кога земјата ја одбележуваше годишнината од независноста. Мал патнички авион се урна непосредно пред слетувањето, при што животот го загубија сите 10 лица што се наоѓале во леталото, вклучувајќи го и пилотот.
Несреќата се случила во северниот дел на островот Андрос, најголемиот остров во архипелагот. Според првичните информации, авионот „Cessna 402“ на локалната авиокомпанија „Flamingo Air“ летал од главниот град Насау кон аеродромот Сан Андрос.
За време на приодот кон пистата, леталото пријавило технички проблеми, по што се урнало во ниска вегетација непосредно пред слетувањето. Никој од патниците и екипажот не преживеал.
Премиерот на Бахамите, Филип Дејвис, трагедијата ја нарече национална катастрофа, истакнувајќи дека денот кој требало да биде исполнет со прослави се претворил во ден на жалост.
Надлежните служби започнаа истрага за причините за несреќата, додека авиокомпанијата соопшти дека целосно соработува со истражните органи. Во меѓувреме, локалните медиуми јавуваат дека летовите на превозникот привремено се суспендирани до завршување на безбедносните проверки.
Засега не се објавени официјални информации за идентитетот и националноста на загинатите, а истрагата треба да утврди што точно довело до фаталната авионска несреќа.