ХАОС ВО РУСИЈА: Наставници распоредени на бензински пумпи, воведени ограничувања за точење гориво
Русија се соочува со сериозна криза со снабдувањето со гориво, а властите во повеќе региони воведуваат вонредни мерки за да го намалат хаосот на бензинските пумпи. Во Краснодарскиот регион, наставници за време на летниот распуст се распоредени на бензински станици, каде што имаат задача да ги регулираат долгите редици и да спречат конфликти меѓу возачите.
Според локалните медиуми, наставниците не добиваат дополнителен надоместок за ангажманот, туку само основно освежување, како чај и кафе. Иако локалните власти тврдат дека ангажманот е доброволен и се однесува главно на машкиот персонал, на социјалните мрежи се појавија тврдења дека на некои вработени им било посочено дека ќе се соочат со последици доколку одбијат.
Недостигот на гориво се поврзува со оштетувањата на руската нафтена инфраструктура по серијата напади врз рафинерии и складишта за гориво, поради што дел од капацитетите се надвор од функција.
Во меѓувреме, кризата се проширува и во други делови на земјата. Во Псковската област се ангажирани волонтери и таканаречени „народни патроли“ за контрола на редиците, додека во повеќе региони се разгледува или веќе се воведува рационализација на продажбата на гориво. Во одредени области точењето би можело да биде дозволено само во одредени денови, зависно од последната цифра на регистарската табличка на возилото.
Во Иркутската област се планира електронски систем за чекање на бензинските пумпи, а во Перм е поднесено барање за организирање јавен протест поради недостигот на гориво.
Украинскиот Генералштаб тврди дека нападите врз руската енергетска инфраструктура оштетиле околу 42,7 проценти од капацитетите за преработка на нафта. Според нивните информации, во последните недели биле погодени повеќе рафинерии, резервоари за складирање и транспортни капацитети.
Според податоци објавени од „Ројтерс“, производството на гориво во Русија во јуни било околу 25 проценти помало во споредба со истиот месец лани, што дополнително го продлабочило недостигот.
Кризата веќе сериозно го погодува и транспортниот сектор. Логистичките компании предупредуваат дека недостигот на дизел гориво доведува до доцнења во испораките, пократки дневни рути на товарните возила и зголемени транспортни трошоци, што може да се одрази и врз цените на стоките низ земјата.