Edhe pse sezoni turistik në Adriatik ende po fillon të marrë hov, reagimet e para të vizitorëve tashmë po shkaktojnë shqetësim.
Gjatë vitit, shpesh janë dëgjuar paralajmërime drejtuar hotelierëve dhe qiradhënësve që të kenë kujdes me formimin e çmimeve, në mënyrë që të tërheqin më shumë turistë. Tani, në fillim të para-sezonit, duket se këto paralajmërime nuk kanë pasur shumë efekt.
Mbetet të shihet si do të jetë sezoni, por sipas përvojës së një slloveneje, tashmë, siç thotë ajo, “është tepër”.
Siç raporton portali slloven Metropolitan.si, në redaksi ka kontaktuar një lexuese e pakënaqur, të cilës disa gjëra nga qëndrimi i fundit në ishullin Krk nuk i dalin nga mendja.
Në fillim të bisedës ajo tregon se familja e saj prej kohësh ka një apartament në ishull:
“E dini, në ishullin Krk kemi prej kohësh një apartament që e përdorim kryesisht jashtë sezonit – pranverë e hershme, fillim vere, vjeshtë dhe dimër, kur koha është e këndshme”, ka thënë ajo.
Megjithatë, ajo shton se situata në muajt e fundit ka shkuar shumë larg:
“Kjo që po ndodh kohët e fundit i ka kaluar të gjitha kufijtë.”
Interesante, arsyeja e pakënaqësisë së saj nuk janë çmimet në restorante dhe kafene, por në dyqane.
“Deri këtë pranverë blinim me kënaqësi peshk (orada) në Lidl. Një paketim me dy orada mesatare, rreth 700 gram, kushtonte më pak se 9 euro, midis 8.50 dhe 8.90 euro. Por kur erdhëm në Krk për Pashkë, ato nuk i gjetëm më.
Kur u kthyem, të njëjtat paketime kushtonin deri në 13.90 euro për 720 gram. Kjo do të thotë se për vetëm disa muaj janë rritur me 5 euro. Kjo është çmenduri. Çfarë mendojnë ata? Kjo është vërtet shumë”, ka thënë ajo.
Ajo shton se, për fat, ka marrëdhënie të mira me fqinjët kroatë, me të cilët shpesh përgatisin ushqime së bashku:
“Edhe atyre u duket çmimi i tepruar, kështu që u morëm vesh ta sjellim peshkun nga jashtë dhe të mos e blejmë më këtu, të paktën jo me këto çmime. Fqinji gjeti një opsion më të lirë në Zagreb.”
“Me të vërtetë më duket absurde të sjell ushqim nga Sllovenia. Por çfarë mund të bëj? Me këto çmime nuk kam zgjidhje. Disa gjëra këtu kushtojnë si te ne, por të tjera janë aq të shtrenjta sa është më mirë t’i sjell me vete.”
Edhe pse thotë se do të donte të mbështeste tregtarët dhe prodhuesit lokalë, ajo thotë se kjo është e vështirë kur çmimet “shkojnë në qiell”.
“Pyes veten, nëse ky është vetëm fillimi i sezonit, çfarë na pret më vonë? Sa do të rriten çmimet e tjera? Dikur sllovenët i kritikonin turistët që sillnin bukë, domate dhe ushqime në plazh. Por pas gjithë kësaj, duket se edhe ne nuk jemi larg kësaj, që është vërtet e trishtueshme. Nuk mund ta imagjinoj as si është për vendasit, sepse edhe për ta këto çmime janë shumë të larta”, ka deklaruar sllovenja