БИТОЛСКИТЕ НАВИВАЧИ ПОСТАВИЈА ЗАСЕДА И НАПАДНАА ЕДНО КОМБЕ
Вистинска тензија се чувствува во Битола по поразот на Е. Пелистер во полуфиналето од Купот на Македонија од екипата на ГРК Охрид.
Револтот кај навивачите на битолскиот клуб кулминирал веднаш по натпреварот, кога на социјалните мрежи се појави видео од инцидент што се случил на регионалниот пат во близина на Битола.
Според првичните информации, група навивачи познати како „Чкембари“ пресретнале комбе и го нападнале во, како што се тврди, однапред подготвена заседа.
Сè уште нема официјална потврда за тоа кој точно се наоѓал во возилото.
Дел од информациите што кружат на социјалните мрежи посочуваат дека мета на нападот биле ракометари на Пелистер, како израз на незадоволство од нивната игра.
Други извори, пак, тврдат дека станува збор за навивачи на ГРК Охрид кои се враќале од Струмица кон својот град.
Надлежните институции засега не излегоа со официјален став за инцидентот.
Се очекува полицијата да спроведе истрага и да утврди што точно се случило, како и да ги идентификува учесниците во инцидентот.
Во меѓувреме, на социјалните мрежи се појави и порака за која се тврди дека доаѓа од „Чкембарите“, во која стои: „Баравте проблем – добивте!“, што дополнително ја зголеми загриженоста во јавноста.