Турција забрани влез на туристички брод со ЛГБТ патници
Турските власти не дозволија туристички брод со американски ЛГБТ патници да се закотви во пристаништата во земјата, повикувајќи се на „моралните стандарди“ и „семејните вредности“, соопшти извршниот директор на компанијата што го организира претстојното медитеранско крстарење.
Бродот, кој плови на рутата Атина – Венеција, треба да исплови од Грција на 5 јули, а според првичниот план два дена подоцна требаше да се закотви во турскиот крајбрежен град Кушадаси, а потоа да продолжи кон Истанбул. Патувањето го организира компанијата Atlantis Events.
Сепак, турските локални власти во последен момент ја откажале посетата, наведувајќи дека бродот – на кој се очекува да патуваат повеќе од 1.000 патници од САД – бил изнајмен од групи „познати по однесување кое не е во согласност со структурата на општеството и нашите морални вредности“.
Бродот Scarlet Lady, кој е во сопственост на компанијата Virgin Voyages, поддржана од британскиот милијардер Ричард Бренсон, нема да влезе во турските пристаништа.
Од Atlantis Events соопштија дека наместо Турција, крстарењето ќе продолжи со застанувања во Каиро, Египет, и на грчкиот остров Крит.