ТРАГЕДИЈА ВО СКОПЈЕ: Син со нож го усмртил татко си откако ја нападнал неговата мајка
Трагичен семеен инцидент се случил синоќа во скопската населба Бит Пазар, каде што 31-годишен маж е уапсен под сомнение дека со нож го усмртил својот татко, откако претходно тој физички ја нападнал неговата мајка.
Според информациите од Министерството за внатрешни работи, настанот бил пријавен на 12 јули околу 22:35 часот во семејниот дом. Според првичните сознанија, 52-годишниот Е.Л., кој бил под дејство на алкохол, ја нападнал својата 54-годишна сопруга.
Во обид да ја заштити мајка си, нивниот 31-годишен син Б.Џ. му нанел убодни рани со нож на својот татко. Од здобиените повреди, 52-годишниот маж починал.
Полициски службеници од СВР Скопје веднаш интервенирале и околу 23 часот го лишиле од слобода осомничениот Б.Џ.
Повредената 54-годишна жена е пренесена во болницата „Св. Наум Охридски“, каде што ѝ е укажана медицинска помош.
Од МВР информираат дека по целосно расчистување и документирање на случајот ќе биде поднесена соодветна кривична пријава, а истрагата за сите околности поврзани со трагичниот настан е во тек.