ТРАГЕДИЈА ВО ГЕРМАНИЈА: Семејното куче усмрти четиригодишно девојче
Голема трагедија ја потресе Германија, откако четиригодишно девојче го загуби животот по напад од семејното куче во областа Остерниенбургер Ланд.
Според германските медиуми, несреќата се случила во средата околу 16:00 часот. По повикот за итна помош, на местото веднаш пристигнале полицијата, екипи на Брзата помош и лекар, кои со сите сили се обиделе да го реанимираат девојчето. За жал, и покрај долгите напори, лекарот можел само да ја констатира смртта.
Според првичните информации од полицијата, девојчето и кучето се наоѓале во истиот дом кога дошло до нападот. Се сомнева дека животното му нанело тешки и смртоносни повреди на детето.
Кога полициските службеници пристигнале на местото на трагедијата, кучето повеќе не претставувало непосредна опасност. По инцидентот, животното било ставено под контрола и предадено во установа за заштита на животни.
Полицијата во Десау-Рослау отвори истрага за да ги утврди сите околности што довеле до оваа трагедија. Засега не се соопштени дополнителни детали за расата на кучето или за причините поради кои дошло до нападот.