СИЛЕН ЗЕМЈОТРЕС ГО ПОТРЕСЕ КРИТ – ГРАЃАНИТЕ ВО СТРАВ, СЕ СЛЕДИ СОСТОЈБАТА
Силен земјотрес со јачина од 5,7 степени според Рихтер рано утринава го погоди морскиот дел јужно од грчкиот остров Крит, предизвикувајќи вознемиреност кај населението, но засега нема информации за материјална штета или повредени.
Според податоците од Геодинамичкиот институт, епицентарот бил лоциран на околу седум километри југозападно од крајбрежниот град Гудура, на длабочина од само 5 километри, што придонело потресот силно да се почувствува во источниот дел на островот.
Локалните власти веднаш реагираа. Заменик-префектот Јанис Андрулакис изјави дека службите внимателно ја следат состојбата, додека цивилната заштита е ставена во состојба на зголемена готовност.
Потресот не бил почувствуван само на Крит, туку и на соседните острови Касос и Карпатос. Сеизмолозите предупредуваат дека веќе се регистрирани последователни потреси, од кои најсилниот достигнал 3,8 степени.
Експертите смируваат дека активноста се одвива на значително растојание од копното, што ја намалува опасноста од поголеми последици, но сепак апелираат на внимателност.
Потсетуваат дека во 2020 година во истиот регион бил регистриран уште посилен земјотрес од 6,6 степени, кој, и покрај јачината, не предизвика значителни штети поради оддалеченоста од населените места.